പണം തട്ടാൻ അജ്ഞാത മൃതദേഹംപുഴയിൽ തട്ടി പോലീസ്..!
- 02/09/2017
പണം തട്ടാൻ അജ്ഞാത മൃതദേഹംപുഴയിൽ തട്ടി പോലീസ്..! ബിഹാറിൽ റെയിൽവെ പോലീസുകാർ 1,500 രൂപയ്ക്കു വേണ്ടി അജ്ഞാത മൃതദേഹം പുഴയിലെറിഞ്ഞു. നോർത്ത് ബിഹാറിലെ ധാർബംഗയിലായിരുന്നു സംഭവം. വ്യാഴാഴ്ച ധാർബംഗ റെയിൽവെ സ്റ്റേഷനിൽ അജ്ഞാത മൃതദേഹം കണ്ടെത്തി. ഈ മൃതദേഹമാണ് സംസ്കാരം നടത്താതെ പോലീസുകാർ പുഴയിൽ ഒഴുക്കിയത്. മൃതദേഹം മറവുചെയ്യുന്നതിന് റെയിൽവെ അനുവദിച്ചിരിക്കുന്ന 1,500 രൂപ കൈക്കലാക്കുന്നതിനു വേണ്ടിയായിരുന്നു ഇത്. റെയിൽവെ പോലീസ് ഓഫീസർ അവദേഷ് മിശ്രയും ആംബുലൻസ് ഡ്രൈവറും ചേർന്നാണ് കൃത്യം നടത്തിയത്. ധാരബംഗ- സമസ്തിപുർ റോഡിൽ ബാഗ്മതി നദിയിലാണ് മൃതദേഹം ഉപേക്ഷിച്ചത്. എന്നാൽ ഇവർ മൃതദേഹം ഉപേക്ഷിക്കുന്നത് വഴിയാത്രക്കാരൻ കാണാനിടയായതാണ് സംഭവം പുറത്തറിയാൻ ഇടയാക്കിയത്. വഴിയാത്രക്കാരൻ അവദേഷിനോട് ഇതു സംബന്ധിച്ച് ചോദിക്കുകയും സംഭവം മൊബൈൽ ഫോണിൽ ചിത്രീകരിക്കുകയും ചെയ്തു. പിന്നീട് ഇദ്ദേഹം ഈ ദൃശ്യങ്ങൾ ഫേസ്ബുക്കിൽ പോസ്റ്റ് ചെയ്തു. ഇതോടെ റെയിൽവെ പോലീസിനു നേരെ വലിയ പ്രതിഷേധമാണ് സോഷ്യൽ മീഡിയയിൽ ഉണ്ടായത്. നിരവധി പേർ ഈ ദൃശ്യങ്ങൾ ഷെയർ ചെയ്യുകയും കുറിപ്പ് ഇടുകയും ചെയ്തു. ദൃശ്യങ്ങൾ വൈറലായതോടെ എസ്പി സംഭവം അറിയുകയും അന്വേഷണത്തിന് ഉത്തരവിടുകയും ചെയ്തു. അവദേഷിനെ അന്വേഷണ വിധേയമായി സസ്പെൻഡ് ചെയ്തിരിക്കുകയാണ്.
Top News
