എൻഎസ്എസിനുരാഷ്ട്രീയമില്ല. എല്ലാപാർട്ടികളോടും സമദൂരനിലപാടാണ് സുകുമാരൻ നായർ
- 02/01/2017
ചങ്ങനാശേരി: എൻഎസ്എസിനെ വലയിലാക്കാനോ കീഴ്പ്പെടുത്താനോ ആരും വരേണ്ടതില്ലെന്നു ജനറൽ സെക്രട്ടറി ജി. സുകുമാരൻ നായർ. 140–മത് മന്നം ജയന്തി ആഘോഷങ്ങളുടെ ഭാഗമായി പെരുന്ന മന്നം നഗറിൽ നടന്ന അഖില കേരള നായർ പ്രതിനിധി സമ്മേളനം ഉദ്ഘാടനം ചെയ്യുകയായിരുന്നു അദ്ദേഹം. വലയിലാക്കാൻ ശ്രമിക്കുന്നവരുടെ ആഗ്രഹം നടക്കില്ല. പകരം സൗഹൃദം പങ്കിടാൻ വരാം. നമുക്കുവേണ്ടി പറയാൻ ഒരു രാഷ്ട്രീയ പാർട്ടിയുമില്ല. മുന്നോക്ക വിഭാഗത്തിലെ പാവപ്പെട്ടവരെ സഹായിക്കുന്ന കാര്യം വരുമ്പോൾ നമുക്കുള്ള ഇല മാറ്റിവയ്ക്കും. എൻഎസ്എസിനു രാഷ്ട്രീയമില്ല. എല്ലാ പാർട്ടികളോടും സമദൂര നിലപാടാണ്. സംഘടനയെ ശക്‌തിപെടുത്താൻ വേണ്ടിയാണ് ഈ നിലപാട്. എല്ലാ പാർട്ടികളിലും വിശ്വസിക്കുന്നവർ നമ്മുടെ സംഘടനയിലുണ്ട്. ആ വിശ്വാസം നിലനിർത്തിത്തന്നെ സംഘടനയെ സ്നേഹിക്കണം. പറക്കുളത്ത് 42 ഏക്കർ 36 സെന്റ് സ്‌ഥലത്തു പതിറ്റാണ്ടുകളായി ആവശ്യപ്പെട്ടുകൊണ്ടിരുന്ന എയ്ഡഡ് കോളജിന്റെ പ്രവർത്തനം സമുദായത്തിന്റെ നിരന്തര ഇടപെടലിൽ ഇപ്പോൾ വാടകയ്ക്കെടുത്ത കെട്ടിടത്തിൽ മൂന്നു ബാച്ചുകൾ തുടങ്ങാനായതു സമദൂര നിലപാടിന്റെ വിജയമാണ്– അദ്ദേഹം പറഞ്ഞു. 60 താലൂക്ക് യൂണിയനുകളിൽ നിന്നായി 5683 കരയോഗങ്ങളിലെ പ്രതിനിധികൾ പങ്കെടുത്തു. എൻഎസ്എസ് പ്രസിഡന്റ് പി.എൻ.നരേന്ദ്രനാഥൻ നായർ അധ്യക്ഷത വഹിച്ചു. കരയോഗം രജിസ്ട്രാർ പ്രഫ. വി.പി.ഹരിദാസ് പ്രസംഗിച്ചു.രാവിലെ മുൻ മുഖ്യമന്ത്രി ഉമ്മൻ ചാണ്ടി എംഎൽഎ, കോട്ടയം ജില്ലാ പഞ്ചായത്ത് പ്രസിഡന്റ് ജോഷി ഫിലിപ്പ്, പി.സി. വിഷ്ണുനാഥ് എന്നിവർ മന്നം സമാധിയിലെത്തി പുഷ്പാർച്ചന നടത്തി.
Top News
