പോലീസ് ഭരണം സംഘ്പരിവാറിന്റെ നിയന്ത്രണത്തിലോ കെ.പി.എ മജീദ്.
- 21/12/2016
മലപ്പുറം: കേരളത്തിൽ പോലീസ് ഭരണം സംഘ്പരിവാറിന്റെ നിയന്ത്രണത്തിലാണെന്നു മുസ്ലിംലീഗ് സംസ്‌ഥാന ജനറൽ സെക്രട്ടറി കെ.പി.എ മജീദ്. കഴിഞ്ഞ ദിവസം എഴുത്തുകാരൻ കമൽ സി. ചവറയെയും സാമൂഹിക പ്രവർത്തകൻ നദീറിനെയും കസ്റ്റഡിയിലെടുത്തത് ഇതിന്റെ ഭാഗമായി കരുതാവുന്നതാണ്. യുവമോർച്ചയുടെ പരാതിക്കനുസരിച്ചാണു പോലീസ് കേസെടുക്കുന്നത്. യുഎപിഎക്കെതിരേ പാർലമെന്റിൽ ശബ്ദിച്ചവരാണ് ഇടതുപക്ഷം. അവർ സംസ്‌ഥാനം ഭരിക്കുമ്പോഴാണ് യാതൊരു തത്വദീക്ഷയുമില്ലാതെ യുഎപിഎ പ്രയോഗിക്കുന്നതെന്നു മജീദ് മലപ്പുറത്ത് മാധ്യമ പ്രവർത്തകരോടു പറഞ്ഞു. പീസ് സ്കൂളിനെതിരേ യുഎപിഎ ചുമത്താൻ ശിപാർശയുണ്ട്. ഷംസുദീൻ പാലത്തിനെതിരേ കരിനിയമം പ്രയോഗിച്ചപ്പോൾ കെ.പി. ശശികല, എൻ. ഗോപാലകൃഷ്ണൻ എന്നിവർക്കെതിരേ മതവിദ്വേഷ പ്രസംഗത്തിനു മാത്രമായിരുന്നു പോലീസ് കേസെടുത്തത്. സംസ്‌ഥാനത്ത് ഇടതുനയം യുഎപിഎക്ക് അനുകൂലമാണോ എന്നു സർക്കാർ വ്യക്‌തമാക്കണം. മുഖ്യമന്ത്രിക്കു പോലും പോലീസിനു മേൽ നിയന്ത്രണമില്ലെന്നതാണു സ്‌ഥിതി. എം.എം. അക്ബർ, മുജാഹിദ് ബാലുശേരി എന്നിവർക്കെതിരേയുള്ള നടപടി ചൂണ്ടിക്കാണിക്കുന്നത്, മുസ്്ലിമാണെങ്കിൽ യുഎപിഎ ചുമത്തുമെന്നാണ്. സിനിമാ സംവിധായകൻ കമലിന്റെ വീടിനു മുന്നിൽ സമരം നടത്തിയതു ദേശീയഗാനത്തെ അവഹേളിക്കലാണെന്നു മജീദ് പറഞ്ഞു. യുഎപിഎക്കെതിരേ ജനുവരി ആറിനു കോഴിക്കോട്ട് റാലി നടത്തും. ഇന്നത്തെ നിയമ വ്യവസ്‌ഥ തന്നെ ധാരാളമാണെന്നിരിക്കെ കരിനിയമങ്ങൾ വേണ്ട. എഫ്സിഐ സമരം തീർക്കാൻ വൈകിയതിനാൽ പൊതുമാർക്കറ്റിൽ അരിയുടേതടക്കം വില ഉയർന്നിട്ടുണ്ട്. ഇടതു സർക്കാർ ജനങ്ങളെ ദുരത്തിലാഴ്ത്തുകയാണെന്നും മജീദ് പറഞ്ഞു.
Top News
